قصائد ناصر الفراعنة

قصيدة ناقتي الجديدة

ناقتي يا ناقتي ما عليـك مـن الهـروج

صيحتين في قفى الذيب تقفاهـا العجـاج

العدل يبقى عدل والدروب العـوج عـوج

والعمى من لا معه من فعل كفـه سـراج

يا مكثرة الحكي والفعايـل عـوج هـوج

ما يحذف الناس من كان بيته من زجـاج

يا حمد طير جناحه ورا صـدري يـروج

ويش اسوي كانه افلت من اضلوعي وراج

مولدي في أرض عبقر من العام محجوج

انشدوا عن مولدي ليلة الحج الف حـاج

المطالب يا حمد دونها ضـرب الفجـوج

دونها شربك قراح مثـل شربـك همـاج

ما ثنوا عزم ابن عباس أصحاب البـروج

لين زوجها من اعزب حدب سيفـه زواج

والدهر معنى دخوله من الداخـل خـروج

والله لزبن دخيـل(ن) ولا اسنـع خـراج

يا حمد لا تامن الجدب في خضر المـروج

مزنة العذب الفرات أمطرت ملـحً أجـاج

ولولا قولة والنعم ما اعتلوا فوق السروج

أمة قبلك خبـر حيهـا فـي الأرض داج

لا تعجّب مـن علـوج ٍ توطّتهـا علـوج

والله انّ الشـرّ للشـرّ أحيانـاً عــلاج

في جنوب افريقيا البيض ياطون الزنـوج

وفي شمال افريقيا البيض ما ترفع حجاج

با ترفع عن ارجال عـن الهينـة تـدوج

عالم رامت مرام الصقور وهـي دجـاج

قيصر من فوق غوج وكسرى فوق غوج

والجماعة بينهـم راكبيـن فـوق صـاج

وش نبي في هامة همها ضحكـة غنـوج

أو قيامة قامـة مـا تقـوم عـود عـاج

أحمد الله يوم لي من خلال المـوج مـوج

اركبه لا هاج سِيْف البحَر تحتـي ومـاج

ما تصفّحنـا الليالـي تصفّـح كاتلـوج

لين مع كُلْ حادثٍ ذي حَدَث عشنا مِـزاج

العقيلة ما تبي غيـر بـن حربـان زوج

يوم حاجات الذيابة غـدت عنـد النعـاج

ساقي النشوى لها من خروجٍ في وُلُـوج

كم أنا للصحـو منهـا شديـد الإحتيـاج

يا حمد مسيار ربعي عليّـه فـوج فـوج

غايتي يوم الردي غايته نجمـة و تـاج