خشـــوا نامــــوا ............

يا حلاوه عالتفنن
يا حلاوه عالبدع
لا علم ولا حسابات تجنن
ولا تروح تضرب ودع
أخر كلام عن المشاكل
أسمع و ركز يا جدع

حمله كامله شامله عامله
بين الناس حاله قلق
اللى عجبه الحال رضى
واللى مرضيش اتفلق
حل عاجل للمشاكل
لكل مخلوق أتخلق

حل يضمن السلامه
بعيد اكيد عن الملامه
حل يضمن الابتسامه
و لا يحتاج نقطه عرق

خشوا ناموا

خشوا ناموا لو زعلتوا
و لو فرحتوا خشوا ناموا
خشوا ناموا لو وصلتوا
ولو لسه بدرى خشوا ناموا
خشوا ناموا لو نجحتوا
و احلموا بمعنى النجاح
ولو فشلتوا خشوا ناموا
ناموا و الصباح رباح

من الفلوس بتشتكى طب خش نام
أكيد الحل المنطقى شد الحزام
عشان تعيش منين هتدفع التمن
غمض عينيك تعيش ملك بس ف منام

و لو الشغل كان همك و كان هو الصداع
و تقول مديرك مفترى بفرد الدراع
سيبه يصرخ و إنت نايم على مكتبك
ينادى و انت ف بحر نومك فارد الشراع

ولو المدام فى البيت كان ليها نصيب
أسمع و أول ما يسكت صوت الخطيب
أنوى ولا شىء غيره فى نيتك
بنوم عميق أكرملك من يوم كئيب

صاحى يعنى و مدعى فيك الحياه
زعلان كئيب و معترض و لو قلت أه
تقصد وجع أنين و شكوى و تبتسم
لما تنام و كأنه من الكون منتهاه

فى ناس النوم مفيد لينا و ليهم
و فى ناس أكيد أكيد ملكش فيهم
ناس لو يناموا الكون بحاله ينصلح
و لو يقولوا يبقى كلام عن ماضيهم

و ناس بتطلع للسما و هى صاحيه
و لو تهد تروح و تبنى فى أى ناحيه
ناس عارفه أنه كله أكل عيش
و عليه عايشين راضيين حالهم ف راحيه

خش نام ياللى لسه صاحى عندك
خش نام محدش ابدا راح يعندك
و لو مش ناوى تنام و فى حد ساندك
خد بأيده و إستفيدوا و خشوا ناموا

خشوا ناموا لو زعلتوا
و لو فرحتوا خشوا ناموا
خشوا ناموا لو وصلتوا
ولو لسه بدرى خشوا ناموا
خشوا ناموا لو نجحتوا
و احلموا بمعنى النجاح
ولو فشلتوا خشوا ناموا
ناموا و الصباح رباح

خشوا ناموا